Bu gün Gəncə Dövlət Milli Dram Teatrının aparıcı aktrisası, mürəkkəb qadın obrazlarının mahir ifaçısı, Respublikanın Xalq artisti Pərvanə Qurbanovanın doğum günüdür.
Gencexeber.az məlumat verir ki, Pərvanə Yaqub qızı Qurbanova beş uşaqlı ailənin dördüncü övladı olaraq 2 aprel 1965-ci ildə Gəncədə dünyaya gəlib. Uşaqlıq illəri böyük itkilərlə dolu olub: o, hələ doqquz yaşında anasını, on bir yaşında isə atasını itirib. Orta məktəbi və musiqi məktəbini bitirən Pərvanə, əvvəllər musiqi müəllimi olmağı arzulasa da, 16 yaşında ailəsinə dəstək olmaq məqsədilə Gəncə Dövlət Dram Teatrına üz tutaraq teatr sənətinə yönəlib.
Pərvanənin teatr karyerası 1981-ci ildə Gəncə Dövlət Dram Teatrında başlayıb. O, Azərbaycan teatr və kino sənətində özünəməxsus yeri olan, böyük hörmət qazanmış aktrisa kimi tanınır. 1990-cı ildən başlayaraq Pərvanə Qurbanova həmçinin Gəncə Dövlət Nizami Poeziya Teatrında fəaliyyət göstərib.
Pərvanə Qurbanovanın kino karyerası 1992-ci ildə çəkilən "Xocalı harayı" filmi ilə başlayıb. Bu film Xocalı faciəsini, onun dəhşətlərini sənət dili ilə təqdim edirdi. Pərvanənin buradakı rolu böyük təsir yaratdı.
Bundan əlavə, o, "Yuxu kimi", "Toy gecəsi", "Tufanlı səma", "28 iyun" kimi seriallarda da müxtəlif obrazları ilə çıxış edib. "Yuxu kimi" serialında canlandırdığı Sərvinaz obrazı tamaşaçılar tərəfindən yüksək qiymətləndirilib.
Gəncəli aktrisa Azərbaycan teatr və kino sənətinin inkişafındakı xidmətlərinə görə 4 mart 1992-ci ildə Azərbaycan Respublikasının Əməkdar artisti, 28 oktyabr 2000-ci ildə Azərbaycan Respublikasının Xalq artisti fəxri adına layiq görülüb. 9 may 2012-ci ildə, 30 aprel 2014-cü ildə, 6 may 2015-ci ildə və 6 may 2016-cı ildə Prezident Mükafatı ilə təltif edilib.
