Gəncə şəhər sakini, uzun illərdir Bakıda özəl məktəbdə koordinator və tarix müəllimi kimi fəaliyyət göstərən Turab Əhmədov ADA Universitetinin təşkil etdiyi nüfuzlu "Hacı Zeynalabdin Tağıyev Award" müsabiqəsinin qalibi olub.
Gencexeber.az məlumat verir ki, Turab Əhmədovun müəllifi olduğu "Valideyn məktəbi" layihəsi müsabiqəyə təqdim olunan 50-dən çox layihə arasından birinci yerə layiq görülüb. Mükafatı ona diplomat, fizika-riyaziyyat elmləri doktoru, ADA Universitetinin rektoru Hafiz Paşayev təqdim edib.
"Valideyn məktəbi" layihəsi ADA Universitetinin nəzdində yaradılıb və Azərbaycan Gənc Müəllimlər Assosiasiyası (AGMA), Azərbaycan Respublikası Təhsil İnstitutu (ARTİ), eləcə də İcma əsaslı məktəbəqədər təhsil proqramının tərəfdaşlığı ilə həyata keçirilib.
Layihə çərçivəsində Azərbaycanın müxtəlif bölgələrində yerləşən 50-dən çox məktəbdə valideynlər üçün maarifləndirici təlimlər təşkil olunub.
4 mindən çox valideynin iştirak etdiyi tədbirlərdə valideynlərlə övladlar arasında düzgün ünsiyyətin qurulması, sağlam ailə münasibətləri, texnoloji asılılıqla mübarizə, erkən nikahın fəsadları, ixtisas seçimi və gələcək karyera planlaması kimi mövzulara toxunulub. Bununla yanaşı, layihə çərçivəsində valideyn və övladların birlikdə iştirak etdiyi interaktiv ailə oyunları və ailəvi film saatları da təşkil edilib.
Turab Əhmədov bildirib ki, layihənin yeni mərhələsinə sentyabr ayından etibarən start veriləcək və daha çox ailənin bu təşəbbüsdən faydalanması hədəflənir.
