Gəncə İdman Sarayında "Dəmir Yumruq" peşəkar boks gecəsinin dördüncü buraxılışı baş tutub. Turnirdə Azərbaycanla yanaşı Türkiyə, Qazaxıstan, Gürcüstan, Tailand və Küveyti təmsil edən boksçular rinqə çıxaraq güclərini sınayıblar.
Gencexeber.az-ın məlumatına görə, gecənin diqqət çəkən iştirakçılarından biri gəncəli boksçu Şahlar Nağıyev olub. Peşəkar karyerasında məğlubiyyət yaşamayan idmançımız 6 raunddan ibarət döyüşdə Kani Şaşikantla qarşılaşıb.
Şahlar Nağıyev Hindistan təmsilçisi üzərində qələbə qazanaraq aktivindəki qalibiyyət sayını 19-a yüksəldib.
Qeyd edək ki, Şahlar Nağıyev WBC (Dünya Boks Şurası) A kəmərinin sahibidir, həmçinin Avropa və Dünya kuboklarının mükafatçısı və müxtəlif beynəlxalq turnirlərin qalibi kimi tanınır.
