Gəncəli boksçu Nəbi İsgəndərov Braziliyada keçirilən Dünya kubokunda bürünc medal qazanıb.
Gencexeber.az məlumat verir ki, 70 kiloqram çəki dərəcəsində mübarizə aparan milli üzvü yarışa 1/8 final mərhələsindən başlayıb. O, ilk döyüşündə tacikistanlı Murodjon Aşuraliyevlə qarşılaşıb. Hər üç raundu üstün başa vuran boksçumuz yekunda 5:0 hesabı ilə qalib gəlib.
İsgəndərov 1/4 finalda qazaxıstanlı Farux Toxtassunovu da mübarizədən kənarlaşdırıb. Gərgin keçən görüş boksçumuzun 3:2 hesablı qələbəsi ilə yekunlaşıb.
Gəncə təmsilçisi yarımfinalda braziliyalı Kaian Reislə döyüşüb. Rəqib finala vəsiqə qazandığından Nəbi İsgəndərov Dünya kubokunun bürünc medalına sahib çıxıb.
Qeyd edək ki, kişilərdən ibarət Azərbaycan millisi yarışı 3 qızıl və 1 bürünc medalla komanda hesabında ikinci yerdə başa vurub. Yığmamız turnirə 6 kişi boksçu ilə qatılıb.
Gəncə boks məktəbinin yetirməsi olan Nəbi İsgəndərov hazırda Azərbaycan üzrə öz çəki dərəcəsində birinci pillədə qərarlaşıb. İdmançımız aprelin 29-da Vətənə qayıdacaq.
