Azərbaycanın qadın güləşçisisi Jalə Əliyevanın məqsədi Albaniyanın paytaxtı Tiranada keçirilən Avropa çempionatında qızıl medal qazanmaq olub.
Gencexeber.az məlumat verir ki, bunu 57 kq çəki dərəcəsində mübarizə aparan idmançının özü Azərbaycan Güləş Federasiyasının mətbuat xidmətinə açıqlamasında deyib.
O, növbəti yarışlara daha ciddi hazırlaşacağını vurğulayıb:
"Bu yarışa çox güclü hazırlaşmışdıq. Məqsədim çempion olmaq idi. Ötən il də yarimfinalda zədələndiyim üçün görüşü davam etdirə bilməmişdim. Bu dəfə çempion olmaq istəyirdim. Təəssüf ki, alınmadı. Müəyyən səhvlərə yol verdim. Bu səhvlərin üzərində çalışıb əlimdən gələnin ən yaxşısını edəcəyəm".
Xatırladaq ki, Jalə Əliyeva üçüncü yer uğrunda qarşılaşmada Arina Demçankaya (UWW) "tuş"la qalib gələrək bürünc medala sahib çıxıb.
Qeyd edək ki, 1 fevral 2001-ci ildə Gəncədə dünyaya gələn Jalə Əliyeva karyerası ərzində mühüm uğurlara imza atıb. O, 2024-cü ildə Avropa çempionatının gümüş medalçısı olub, U23 Avropa çempionatlarında (2022, 2024) qızıl medal qazanıb. Həmçinin 2025-ci ildə keçirilən VI İslam Həmrəyliyi Oyunlarının qalibi olub.
