Gəncə kikboksinq məktəbinin yetirmələri beynəlxalq arenada növbəti uğurlarını qazanıblar.
Gencexeber.az məlumat verir ki, Türkiyənin Antalya şəhərində kikboksinq üzrə "WAKO World Cup" yarışı keçirilib. Turnirdə əməkdar məşqçi, beynəlxalq dərəcəli hakim, Qərb regionunun sədri Anar Məmmədovun rəhbərliyi ilə regionun kikboksinq klublarından 7 idmançı iştirak edib. Onlardan 5 nəfəri fəxri kürsüyə yüksələrək yüksək nəticələr əldə edib.
Yarışda Həsən Məmmədov 42 kiloqram çəki dərəcəsində "lou-kik" növü üzrə yeniyetmələr arasında qızıl medal qazanıb. AKF Gəncə təmsilçisi Fərhad Tağızadə isə 54 kiloqram çəki dərəcəsində "ful-kontakt" üzrə gənclər arasında gümüş medala sahib olub.
Digər idmançılardan İdris İsmayılov 57 kiloqram çəki dərəcəsində "lou-kik" üzrə yeniyetmələr arasında bürünc medal əldə edib. Abdullazadə Turan və Nəbiyev Yusif isə 47 kiloqram çəki dərəcəsində "kik-layt" növündə kadetlər arasında üçüncü yerə layiq görülüblər.
İdmançıların şəxsi məşqçiləri Anar Məmmədov, Yaşar İsgəndərov, Hilal Məmmədov və Elcan Cəfərov olub.
Qeyd edək ki, Azərbaycanın kikboksinq üzrə klublardan ibarət yığma komandası yarışda 44 ölkə arasında 5-ci yerə yüksəlib. Yığma komanda ümumilikdə 10 qızıl, 10 gümüş və 14 bürünc medal qazanıb. Azərbaycan Kikboksinq Federasiyası dünya kubokunda 45 idmançı, 10 məşqçi və 8 hakimdən ibarət heyətlə təmsil olunub.
Bundan başqa, dünya kubokunda hakim qismində çıxış edən WAKO beynəlxalq "A" kateqoriyalı gəncəli hakim Anar Məmmədov rinq döyüşlərini yüksək səviyyədə idarə etdiyinə görə "Rinqin ən yaxşı hakimi" adına layiq görülüb.
