Gəncədə küçələrin işıqlandırılması ilə bağlı vəziyyət acınacaqlı qalmaqda davam edir. Hər axşam şəhərin bəzi əraziləri tam qaranlığa qərq olur. Dünyanın əksər iri şəhərlərində belə məsələlərin çoxdan həll olunduğu XXI əsrdə Azərbaycanın ikinci ən böyük şəhərində problem hələ də aradan qaldırılmayıb.
Gencexeber.az-a sözügedən mövzuya dair sakinlərdən mütəmadi olaraq şikayətlər daxil olur. Son müraciətlərdən birində bildirilib ki, Sevinc qəsəbəsində “Gədəbəy” kafesi ətraflnda yerləşən bir neçə küçə işıqlandırılmır. Eyni vəziyyət şəhərin mərkəzində, Atatürk prospektində, “Şəfa” aptekinin arxasında, 49 saylı körpələr evi-uşaq bağçası qarşısında da müşahidə edilir.
Vətəndaşların sözlərinə görə, yaranmış vəziyyət təkcə narahatlıq yaratmır, həm də sakinlərin təhlükəsizliyini təhdid edir. Şəhər küçələrində işıqlandırmanın olmaması şəraitində cinayətkar fəaliyyət üçün əlverişli şərait yaranır. Qaranlıqda oğurluq və digər qanunsuz əməllərin baş vermə ehtimalı artır.
Həmçinin şəhər sakinləri gecə saatlarında daha da təhlükəli hala gələn aqressiv sahibsiz itlərdən şikayət edirlər. Onlar küçə işıqları olmayan ərazilərdə dördayaqlılarla qarşılaşmaqdan qorxurlar.
“İnsanların zülmət qaranlıqda gündəlik təhlükələrə məruz qaldığı bir vaxtda yerli hakimiyyət orqanları problemi həll etməyə tələsmir”, – sakin bildirib.
Cavid Şəmiyev
