Qaramanlı məhəlləsi indiki Pərviz Səmədov, Cavadxan, Həsən Əliyev, Mikayıl Müşfiq, Şahsevənlər və Ozan küçəsinin bir hissəsi olan ərazidə yerləşirdi. Məhəllənin yaranması burada məskən salmış Qaramanlı tayfasının adı ilə bağlıdır.
Bəzi alimlərin sözlərinə görə, Qaramanlı soyu Azərbaycana Anadolunun Qaraman bəyliyindən gəlib. Əslində isə XIV əsrin sonlarında Gəncə və Bərdəni idarə еdən Tərəkəmə kələntərlərindən birinin adı Qaraman bəy idi. Qaraman bəyin soyu sonralar Qaramanlı kimi tanınmağa başladı.
Qaramanlılar Qaraqoyunlu tayfa ittifaqını təşkil edənlərdən biri olublar. Onların, həmçinin Qaraqoyunluların Azərbaycanda hakimiyyətinin möhkəmlənməsində rolu olub. Qaraqoyunluların süqutundan sonra onlar Ağqoyunlu tayfa ittifaqına, daha sonra isə Qızılbaş tayfa ittifaqına qoşulurlar. Qaramanlı tayfasının üzvləri bir müddət Gəncə-Qarabağ bəylərbəyliyini idarə ediblər.
Qaramanlıların bir hissəsi 1588-ci ildə - Gəncə osmanlılar tərəfindən işğal olunduqdan sonra İrana köç edirlər. 1606-cı ildə - Gəncə osmanlılardan azad edildikdən sonra onlar Gəncəyə geri dönərək Qaramanlı məhəlləsini salırlar.
Qaramanlı məhəlləsinin sakinləri “Qara arx” və “Ozan” kəhrizlərinin suyundan istifadə ediblər. Ölülərini isə “Səbiskar” və “Su tökülən” qəbiristanlığında dəfn ediblər. Qaramanlı sakinləri, əsasən, ticarət və dərziliklə məşğul olublar.
1897-ci ildə Qaramanlı məhəlləsində həbsxana inşa edilib. Binanın sol hissəsində çar ordusu əsgərlərinin kazarmaları və süvari əsgərlərinin at tövlələri var idi. Həmçinin kazarmanın yaxınlığında vaxtı ilə rus əsgərlərinin qəbiristanlığı mövcud olub. 1918-ci ildə Gəncəyə gəlmiş Qafqaz İslam Ordusunun süvari polku və at tövlələri Qaramanlı məhəlləsində yerləşirdi.
1932-ci ildə məhəllədə kolxoz yaradılıb. Məhəllə sakinləri, əsasən, “İnqilab” kolxozunda çalışıblar.
Mənbələr:
