Gəncədə sahibsiz itlər sakinləri narahat edir. Bu haqda 21 oktyabr tarixində Kəpəz televiziyasına istinadən məlumat veririk.
Şəhərin mərkəzi küçələrində, şəhərətrafı qəsəbələrində, parklarda sahibsiz itlərin sayının xeyli artımı müşahidə olunur. Bu canlıların quduzluq və digər yoluxucu xəstəliklərin daşıyıcısı olduğu istisna deyil. Bəzi hallarda onlar insanlara hücum edir. Bu da sakinlərin narahatlığına səbəb olur.
Acil şöbəsində işləyən həkim Mirqalib Seyidovun sözlərinə görə, 9 ay ərzində Gəncə şəhəri və ətraf rayonlardan 1112 nəfəri it dişləyib. 55 nəfər isə təkcə bu ay ərzində müraciət edib.
Bir müddət öncə şəhərdə yaradılan sığınacağın rəhbəri Röyalə Əsgərova isə bildirir ki, küçə itlərində aqressivliyi insanlar özləri yaradırlar. Onlara daş atılır, itlər vurulur və qovulur.
“2 ayda biz, demək olar ki, 100-130 arası it qəbul eləmişik. Onlardan 40-a yaxınını əməliyyat etmişik: qısırlaşdırmışıq, birkalamışıq, sağalıblar və mütəmadi müalicə-müayinə etmişik, sonra əksəriyyətinə biz sahib durmuşuq, əksərini isə təyin olunmuş bölgələrə buraxmışıq. Bura ən çox xəstə itlər gəlir: ayaqları şikəst olanlar və s. Biz onları mütəmadi müalicə, müayinə edirik, vitaminlər və peyvəndlər vururuq. Ehtiyac olarsa, əlavə əməliyyatlar edilir və 2-3 həftə ərzində itlər burada qalır. Tam sağaldıqda zərərsiz bir şəkildə biz onları buraxırıq”, - deyə Əsgərova qeyd edib.
