Gəncədə Zərifə Əliyevaya həsr olunan tədbir baş tutub. Bu haqda 16 aprel tarixində Mərkəzləşdirilmiş Kitabxana Sisteminə istinadən məlumat veririk.
“Milyonların gözünə nur verən xanım” adlı tədbir 19 saylı Kitabxana filialının təşkilatçılığı ilə 13 saylı tam orta məktəbdə keçirilib. Burada oftalmoloq akademik Zərifə Əliyevanın və torpaqlarımızın azadlığı uğrunda canlarından keçən şəhidlərin xatirələri bir dəqiqəlik sükutla yad edilib.
19 saylı Kitabxana filialının müdiri Zərifə xanımın həyat yolu, elmi axtarışları, oftalmologiya sahəsinə gətirdiyi yeniliklər haqqında məlumat verib. Daha sonra “Bir ömrün imzası - Zərifə Əliyeva” adlı kitabı iştirakçılara təqdim edib. 13 saylı tam orta məktəbin direktor müavini, psixoloq, kitabxana işçiləri, Uşaq Təşkilatı Birliyinin rəhbəri, sosial pedaqoq Azərbaycan xalqını dünyada tanıdan, adı məşhur liderlərlə qoşa çəkilən Prezident İlham Əliyev kimi lideri xalqımıza bəxş edən Zərifə xanımın ən səmimi sözlərə, hörmətə layiq Azərbaycan qadını kimi ölkəmizdən kənarlarda belə ad–san qazanmasından, məsul vəzifələrdə çalışan ulu öndərə layiq həyat yoldaşı olmasından, onunla çiyin-çiyinə addımlayaraq onun yüksəldiyi zirvənin yarısını qət etmək bacarığına malik olduğundan danışıblar.
Tədbirdə, həmçinin “Xeyirxahlıq ağıl və qüdrət məktəbi” adlı videoçarx nümayiş olunub.
