Ramazan ayında iftar zamanı hər bir süfrədə suyun yanında mütləq şəkildə xurma ikram edilir. Bəs buna səbəb nədir? Gəncəxəbər.az redaksiyası xurmanın faydaları ilə bağlı məqalə hazırlayıb, oxucularına təqdim edir.
Xurma qan şəkərinin bərpası, orqanizmin aclığa qarşı müqavimətinin artırılması, bədənin enerji dəyərinin yüksək saxlanılmasında yardımçı olur. Bir ədəd quru xurma 20-28 kaloridir, lakin növündən asılı olaraq, qidalılıq dəyəri dəyişir. Bu meyvənin tərkibində A, K və B qrup vitaminlər, natrium, kalium, kalsium, dəmir, mis, maqnezium, manqan, fosfor və sink kimi minerallar mövcuddur. Dəmir mineralının sayəsində hemoqlobinin sintezi artır. Bu da qanazlığının qarşısının alınmasına güclü təsir göstərir.
Xurma meyvə şəkəri, zülal, karbohidrat və liflə zəngin olduğu üçün toxluq hissi yaradır və uzun müddət aclığa qarşı müqavimət artır. Həmçinin xurmadakı zəngin maddələr ürək-damar xəstəlikləri riskini azaldır, həzm sistemini tənzimləyir, immun sistemini gücləndirir, göz, dəri və sümük sağlamlığını qoruyur.
