Gəncədə növbəti layihə başa çatıb. Bu haqda 15 yanvar tarixində Regional Mədəniyyət İdarəsinə istinadən məlumat veririk.
Azərbaycanda ilk dəfə “Xalqın mədəni sərvəti” layihəsi keçirilib. Təntənəli bağlanış mərasimi Fikrət Əmirov adına Gəncə Dövlət Filarmoniyasında təşkil olunub. “Musiqi paradı” görkəmli bəstəkarımız, dünya musiqisində simfonik muğam janrının banisi Fikrət Əmirovun əsərlərindən hazırlanıb.
Bağlanış mərasimində qonaqlar əvvəlcə foyedə gənc Gəncə rəssamlarının Fikrət Əmirova həsr olunmuş rəsm əsərlərindən ibarət sərgisi ilə tanış olublar. Layihənin ideya müəllifi və bədii rəhbəri Gəncə Dövlət Filarmoniyasının direktoru Ramil Qasımov vurğulayıb ki, Gəncə - Daşkəsən Regional Mədəniyyət İdarəsi ilə birgə həyata keçirilən layihənin məqsədi istedadları üzə çıxarmaqdır. “Musiqi paradı” xalqımızın istedadlı övladlarının gələcəkdə təbliği üçün nəzərdə tutulub. O, 8-14 yanvar tarixlərində ümumilikdə 4000-ə yaxın musiqiçinin iştirak etdiyini bildirib.
Tədbirdə şəhərimizdə fəaliyyət göstərən Fikrət Əmirov adına 1 saylı Uşaq Musiqi Məktəbi (UMM), Telman Hacıyev adına 2 saylı UMM, 3,4,5 saylı UMM-ləri, Uşaq İncəsənət Məktəbi, Naftalan şəhər UMM, Goranboy şəhər Uşaq İncəsənət Məktəbi, Goranboy rayonunda fəaliyyət göstərən UMM-lər, Daşkəsən şəhər Uşaq İncəsənət Məktəbi, Samux rayonunda fəaliyyət göstərən UMM-in şagirdləri görkəmli bəstəkar Fikrət Əmirovun əsərlərini səsləndiriblər.
