Rəsmi şəxslər Gəncədən olan şəhidin məzarını ziyarət ediblər. Bu haqda 27 yanvar tarixində Apa-ya istinadən xəbər veririk.
Xarici İşlər Naziri Ceyhun Bayramov və rəhbər heyəti II Şəhidlər xiyabanında olublar. Onlar ötən il Azərbaycan Respublikasının İran İslam Respublikasındakı Səfirliyinə qarşı törədilmiş terror aktı nəticəsində şəhid olmuş Orxan Əsgərovun məzarını ziyarət ediblər.
Qeyd edək ki, 27 yanvar 2023-cü il tarixində Azərbaycan Respublikasının İran İslam Respublikasındakı Səfirliyinə silahlı hücum olub. Hücum edən şəxs “Kalaşnikov” markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib. Şəhidimiz 3 fevral 2023-cü ildə ölümündən sonra "Vətən uğrunda" medalı ilə təltif edilib.
Hadisədən sonra Azərbaycanın Tehrandakı Səfirliyinin fəaliyyəti dayandırılıb. Əməkdaşlar 29 yanvar 2023-cü il tarixində Tehrandan Bakıya təxliyə olunublar. Baş vermiş cinayət hadisəsi üzrə İran İslam Respublikasında istintaq edilən cinayət işinin gedişatı Azərbaycan Baş Prokurorluğu tərəfindən diqqətlə izlənilir və qarşı tərəflə mütəmadi əlaqə saxlanılır.
