Gəncədə qəzalı məktəblər təmir olunacaq. Bu haqda 29 noyabr tarixində Kəpəz televiziyasına istinadən məlumat veririk.
Söhbət şəhərin 19, 24 və 42 nömrəli məktəblərindən gedir. 45 ildir fəaliyyət göstərən 19 nömrəli məktəb haqda bir müddət öncə xəbər paylaşmışdıq. Təhsil müəssisəsinin binası qəzalı vəziyyətdədir. Məktəbin vəziyyəti həm valideynlərin, həm də müəllimlərin narahatlığına səbəb olur. Onlar binanın əsaslı təmirə ehtiyacı olduğunu deyirlər. Burada Azərbaycan və rus bölmələrində 763 şagird oxuyur.
Regional Təhsil İdarəsinin məsləhətçisi Raminə Məmmədova bildirib ki, 19 və 42 nömrəli məktəblərin mərhələli şəkildə təmir edilməsi planlaşdırılır.
Bundan başqa, 24 nömrəli orta məktəbdə noyabr ayının 13-dən söküntü işləri aparılır. Dekabrın əvvəlindən təmirinə başlanılacaq. İşlərin yeni tədris ilinə qədər başa çatması gözlənilir.
Həmin müddətdə təhsil ocağının şagirdləri təhsillərini 43 nömrəli orta məktəbdə davam etdirəcəklər.
[modula id="50740"]
