Gəncədə konsert təşkil olunub. Bu haqda 9 aprel tarixində Gəncə Dövlət Filarmoniyasına istinadən məlumat veririk.
İlk dəfə şəhərimizdə Gəncə Dövlət Filarmoniyasında klassik gecə baş tutub. Tədbir Gəncə-Daşkəsən Regional Mədəniyyət İdarəsinin dəstəyi ilə keçirilib.
Burada Xalq artisti Sevinc İbrahimova, Əməkdar Mədəniyyət işçisi Mehparə Cəfərova, Əməkdar artist Tural Abdullayev, Əməkdar artist Kəmalə Tağızadə, Vasif Bayramov, Rüstəm Cəfərov, Fidan Məmmədzadə, Qaya Nəsibzadə çıxış ediblər. Onlar Üzeyir Hacıbəylinin "Koroğlu" operasından Həsən xanın ariyası, Asəf Zeynallının “Ölkəm” romansı, Fikrət Əmirovun “Sevil” operasından "Balaşın mahnısı", “Dilbərin nəğməsi”, Niyazinin "Arzu" və Asəf Zeynallının “Ölkəm” romansları, Cakomo Puççininin “Gianni Schichi” operasından “Laurettanın” ariyası, Ernest de Kurtis “Sorentoya qayıt”, Corc Bizenin "Karmen" operasından Toreadorun ariyasını səsləndiriblər.
Konsert tamaşaçılar tərəfindən maraqla qarşılanıb.
Qeyd edək ki, proqramın ay ərzində bir dəfə təqdim olunması planlaşdırılır. Məqsəd Nizami yurdunda fəaliyyət göstərən istedadlı gənc klassik ifaçıları üzə çıxarmaqdır.
