Gəncədə filmlər nümayiş olunub. Bu haqda 29 fevral tarixində Kəpəz televiziyasına istinadən məlumat veririk.
Tədbir Şəhər İcra Hakimiyyəti və Baku Media Mərkəzinin dəstəyi, Nizami Bələdiyyəsinin və Gəncə-Daşkəsən Regional Mədəniyyət İdarəsinin birgə təşkilatçılığı ilə baş tutub. Burada “Şuşa, sən azadsan!” və “Hadrut, sən azadsan!” sənədli filmləri nümayiş olunub.
Filmdə müasir hərb tarixinin ən parlaq səhifələrindən biri olan “Şuşa əməliyyatı”nın ən diqqətçəkən və qürur dolu nüansları təqdim edilib. İlk filmdə bu əməliyyatın iştirakçıları olan Azərbaycan əsgər və zabitləri ilə müsahibələr, Şuşa şəhəri uğrunda döyüşlərin gedişatında çəkilən eksklüziv kadrlar film vasitəsilə gənclərə nümayiş olunub.
“Hadrut, sən azadsan!” filmində isə 2020-ci il Vətən müharibəsinin parlaq səhifələrindən biri – Xocavənd rayonunun Hadrut qəsəbəsinin azad olunmasından danışılır. Gənclərə zəfər salnaməsinin ən qürurverici anları bir daha xatırladılıb.
Qeyd edək ki, hər iki filmin baş prodüseri Arzu Əliyevadır.
