Gəncədə böyük bir ərazi zibillik içindədir. Bu haqda 28 mart tarixində Oxu.az-a istinadən xəbər veririk.
Şəhərin Cavadxan qəsəbəsində böyük bir ərazi zibilliyə çevrilib. Sakinlərin sözlərinə görə, qəsəbəyə zibil qutuları qoyulmadığı və tullantılar daşınmadığı üçün vəziyyət bu həddə çatıb. Onlar əlavə ediblər ki, əraziyə tullantılar, əsasən, gecə saatlarında kənar yerlərdən maşınla gətirilərək atılır.
Bundan əlavə, tullantıların ətrafına toplaşan sahibsiz itlər də sakinlərin narahatlığına səbəb olur.
Məsələ ilə əlaqədar Gəncə şəhər Mənzil Kommunal Təsərrüfatı İstehsalat Birliyinin Mətbuat Xidmətindən bildirilib ki, sözügedən ərazi şəxsi mülkiyyətdə olduğundan ora nəzarət səlahiyyəti də yerin sahibinə aiddir. Qurumun həmin əraziyə mütəmadi daxil olmaq və xidmət aparmaq hüququ yoxdur.
