Gəncədə məktəblilərlə görüş keçirilib. Bu haqda 14 fevral tarixində Azərtac-a istinadən məlumat veririk.
Gənclər Fondunun dəstəyi və “Gələcəyə Körpü” Gənclər İctimai Birliyinin təşkilatçılığı ilə keçirilən “Şagirdlərin peşə təhsili bələdçisi” layihəsinin ilk mərhələsi start götürüb. İlk seminar 3 nömrəli tam orta məktəbdə baş tutub. Burada 20 şagird iştirak edib. Tədbirdə onlara prioritet peşə ixtisasları, Gəncədə fəaliyyət göstərən peşə mərkəzləri, tədris olunan ixtisaslar, qəbul qaydaları və Azərbaycanda olan peşə ixtisaslarının inkişaf perspektivləri haqqında geniş məlumat verilib.
Layihənin məqsədi şəhərimizdəki orta ümumtəhsil məktəblərində oxuyan şagirdlərin peşə təhsilinə maraqlarının artırılması, peşə sahələrinin yaratdığı iş imkanlarının onlara təlqin olunması və bu prioritet sahənin icra ediləcək fəaliyyətlər vasitəsilə hədəf kütləsinə səmərəli şəkildə çatdırılmasıdır.
Bildirilir ki, proyektin ilk mərhələsi şəhərin daha 6 orta ümumtəhsil müəssisəsində məlumatlandırıcı seminarların təşkili ilə davam edəcək. Daha sonra isə həmin məktəblərdən seçilən şagirdlərin Sənaye və Texnologiyalar üzrə və Ticarət və Xidmət üzrə Gəncə Dövlət Peşə Təhsil mərkəzlərinə səfərləri təşkil olunacaq.
