Bu gün şəhid Nazim Süleymanov və Ceyhun İsmayılovun doğum günüdür.
Nazim Nəcəf oğlu Süleymanov 30 dekabr 1963-cü ildə Göyçə mahalının Sarıyaqublu kəndində anadan olub. Sarıyaqublu kənd orta məktəbini bitirdikdən sonra 1981-ci ildə həqiqi hərbi xidmətə çağırılıb. Sovet ordusu sıralarında xidmət edib. O, 1988-ci ildə ailəsi ilə birlikdə məlum hadisələrlə əlaqədar olaraq, Gəncə şəhərinə gəlib. Nazim Alüminium zavodunda çilingər işləyib. 1 noyabr 1993-cü ildə əsgərliyə çağırılıb.
Nazim Süleymanov 7 yanvar 1994-cü ildə Ağdərə uğrunda gedən döyüşlərin birində şəhidlik zirvəsinə ucalıb.
Ceyhun Abbas oğlu İsmayılov 30 dekabr 1985-ci ildə Gəncədə anadan olub. 40 nömrəli tam orta məktəbi bitirib. O, 2004-2006-cı illərdə Dövlət Sərhəd Xidmətində xidmət edib. 2008-ci ildə Müdafiə Nazirliyi Silahlı Qüvvələrinin Təlim-Tədris Mərkəzinə MAHHX HQ təyin edilib. 2013-cü ildə gizir hazırlığı kursu keçib. Müdafiə Nazirliyinin Təlim-Tədris Mərkəzində qulluq edib, gizir hərbi rütbəsi alıb.
Ceyhun İsmayılov “Azərbaycan Silahlı Qüvvələrinin 95 illiyi (1918-2013)” yubiley medalı, "Qüsursuz xidmətlərə görə" III dərəcəli medalı ilə təltif olunub. O, II Qarabağ müharibəsində Füzuli və Xocavənd rayonlarının işğaldan azad olunması uğrunda gedən döyüşlərdə iştirak edib.
Komandir 1 oktyabr 2020-ci ildə Füzuli rayonu istiqamətində gedən döyüşdə şəhidlik zirvəsinə ucalıb.
2 oktyabr 2020-ci ildə Gəncə şəhər Şəhidlər xiyabanında dəfn edilib.
Şəhidimiz ölümündən sonra Prezident tərəfindən “Vətən uğrunda” və “Füzulinin azad olunmasına görə” medalları ilə təltif olunub.
