Gəncədə növbəti iməcilik aksiyası keçirilib. Bu haqda 3 fevral tarixində MKTİB-yə istinadən xəbər veririk.
Şəhərin Atatürk prospekti boyu genişmiqyaslı təmizlik işləri görülüb. İməcilik İcra Hakimiyyəti Mənzil Kommunal Təsərrüfatı İstehsalat Birliyi tərəfindən təşkil olunub. Təmizlik işləri Atatürk və Nizami Gəncəvi prospektlərinin kəsişməsindən başlayaraq Dəmir Yolu Vağzalına qədər ərazidə aparılıb.
Adıçəkilən ərazilərə qurumun canlı qüvvəsi və texnikası cəlb olunub. Prospektlər məişət tullantılarından, alaq otlarından, daş, qum və toz-torpaqdan təmizlənib. Məişət tullantılarının atılması üçün nəzərdə tutulan müxtəlif tutumlu konteynerlərin və zibil qutularının ətrafı tam təmizlənib. Yol boyu mövcud olan yaşıllıqlara aqrotexniki qulluq göstərilib.
Qeyd edək ki, MKTİB tərəfindən təşkil edilən bu kimi iməcilik aksiyaları mütəmadi olaraq, şəhərin müxtəlif ərazilərində hər həftənin şənbə günləri davam etdirilir.
