Gəncədə səhiyyə işçiləri üçün tədbir keçirilib. Bu haqda 28 dekabr tarixində Şəhər Birləşmiş Xəstəxanasına istinadən məlumat veririk.
“2023-cü ilin yekunlarına və qarşıda duran məsələlərə dair” hesabat tədbiri Şəhər Birləşmiş Xəstəxanası (ŞBX) tərəfindən təşkil olunub. Burada öncə xəstəxananın fəaliyyətinə həsr olunan videoçarx nümayiş etdirilib.
Səhiyyə ocağının direktoru İlkin İsmayılov cari il ərzində görülən işlərdən danışıb. O, tibbi xidmətin daha keyfiyyətli və əlçatan olması istiqamətində müəyyən edilən hədəflərdən və maddi-texniki bazanın yenilənməsindən bəhs edib.
Daha sonra direktor müavinləri, şöbə müdirləri ŞBX-nin nəzdində fəaliyyət göstərən tibb müəssisələrində son bir il ərzindəki yeniliklərdən, əldə olunan uğurlardan, hədəflərdən söz açıblar.
Tədbirdə səhiyyə sahəsindəki səmərəli fəaliyyətinə görə bir qrup tibb işçisinə təşəkkürnamə də təqdim olunub.
Görüş müzakirələr zamanı meydana çıxan məsələlər ətrafında fikir mübadiləsi ilə davam edib.
