Gəncə Şəhər İcra Hakimiyyətinin başçısı məktəblərin birində olub. Bu haqda 13 fevral tarixində İcra Hakimiyyətinə istinadən xəbər veririk.
Niyazi Bayramov növbəti dəfə 29 nömrəli tam orta məktəbi ziyarət edib. Şəhər rəhbərinə məlumat verilib ki, 960 şagird yerlik məktəb binasında sinif otaqları, fizika, kimya və biologiya laboratoriyaları, 2 STEAM otağı, kompüter və müəllimlər otaqları, hərbi kabinet, kitabxana, bufet və idman zalı yerləşir. Həmçinin 360 yerlik akt zalı, qrim otağı, məktəbəhazırlıq otağı, müasir tələblərə cavab verən kitabxana da fəaliyyət göstərir.
Hazırda 29 nömrəli tam orta məktəbdə 1068 şagird təhsilini davam etdirir. Şəhər başçısı məktəbin bufetində şagirdlərlə birgə çay süfrəsi ətrafında söhbət edib və öz tövsiyələrini verib.
Xatırladaq ki, məktəb binası Vətən müharibəsi zamanı Gəncə şəhərinin Ermənistan silahlı qüvvələri tərəfindən raket atəşinə məruz qalması nəticəsində zərər görüb.
