Gəncədə açılış mərasimi keçirilib. Bu haqda 19 dekabr tarixində Azərtac-a istinadən məlumat veririk.
Bakıdakı Rus Evi Nizami yurdunda rus dilinin öyrənilməsi üzrə üçüncü resurs mərkəzini açıb. Müəssisə Gəncə və ölkəmizin Qərb regionu üzrə Rus İcmasının nümayəndəliyinin bazasında fəaliyyət göstərəcək.
Açılış mərasimində Rusiya Federasiyasının Azərbaycandakı Səfirliyinin müşavir-elçisi Pyotr Volokovıx, Bakıdakı Rus Evinin rəhbəri İrek Zinnurov, “Azərbaycanda rus dili və ədəbiyyat” jurnalının baş redaktoru Flora Nacı, Azərbaycanın Rusdilli Tədris Müəssisələrinin Müəllimləri Assosiasiyasının sədri Lyubov Yakunina, Rusiya və Sovet Ali Məktəblərinin Məzunları Assosiasiyasının sədri Üzeyir Əliyev, Azərbaycanın Rus İcması yanında Gəncə və Qərb regionu üzrə Rus İcmasının nümayəndəliyinin rəhbəri Dmitri Kozin, ali təhsil müəssisələri və məktəblərin müəllimləri, şagirdlər və tələbələr iştirak ediblər.
Tədbir çərçivəsində rus dili və ədəbiyyat müəllimləri üçün seminar təşkil olunub. Burada, həmçinin bir sıra məsələlər müzakirə edilib.
Flora Nacı Azərbaycanda rus dilinin tədrisində jurnalın rolu haqqında məruzə ilə çıxış edib, Gəncə Dövlət Universitetinin Rus dili kafedrasının dosenti Sevda Əliyeva Mirzə Şəfi Vazehin rus dilinə tərcümə edilmiş əsərlərindən parçalar oxuyub. Daha sonra Lyubov Yakunina seminarın nəticələrinə yekun vurub.
Tələbələr və məktəblilər “Coğrafi imla” beynəlxalq maarifləndirmə aksiyasının sertifikatları ilə təltif ediliblər.
