Gəncədə məktəbəqədər təhsilin əhatəliliyinin artırılması məqsədi ilə görüş təşkil olunub. Bu haqda Regional Təhsil İdarəsinə istinadən xəbər veririk.
Görüş "Dövlət-özəl məktəbəqədər təhsil müəssisələri arasında əməkdaşlığın qurulması" mövzusunda olub. Burada İstanbul Büyükçekmece Şehit Mehmet Şefik Şefkatlioğlu Anaokulu Müdürü Erdoğan Ergin çıxış edib. O, uşaqlarda demokratik düşüncənin inkişaf etdirilməsi, müxtəlif bacarıqların təkmilləşdirilməsi, uşaqlara şəxsiyyət olaraq yanaşma üsul və formaları, sosial emosional vəziyyət, məktəbəqədər təhsilin inkişaf aspektləri barədə məlumat verib.
Daha sonra çıxış edən Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin Məktəbəqədər təhsilin təşkili şöbəsinin müdiri İlahə Rəsulova 21-ci əsr bacarıqları, məktəbəqədər təhsil müəssisələrində məşğələlərin təkmilləşdirilməsi məsələləri barədə danışıb.
