Bəzi insanlarda Ramazan ayında səfər edərkən orucun tutulması qaydası ilə bağlı suallar yaranır. Bu səbəbdən Gəncəxəbər.az redaksiyası olaraq, müqəddəs ayda səfərlə bağlı məqalə hazırladıq.
Öncə səfərin nə olduğunu bilmək lazımdır. İnsanın yaşadığı şəhərin çıxışından ən azı 22 kilometr (tərəxxüs həddi) uzaqlaşıb, burada 10 gündən çox qalmaması səfər hesab olunur. Oruc tutarkən əsas şərtlərdən biri səfərə zöhr (günorta) namazından öncə və ya sonra çıxmaqdır. Çünki zöhr azanından sonra yola düşən şəxsin oruc tutması vacibdir. Lakin çatdığı məntəqədə 10 gündən az qalacaqsa, növbəti gün oruc tutmamalıdır. Orucu, həmçinin zöhr azanından öncə səfərə gedən və azana kimi vətəninə qayıdan şəxs tutmalıdır. Burada şərt zöhr azanında vətəndə olmaqdır.
Bir şəxs zöhrdən öncə şəhərdən ayrılırsa, lakin 22 kilometr məsafəni azandan sonra qət edirsə, zöhrdən öncə səfərə çıxmış hesab olunur. Həmin insan tərəxxüs həddini keçdikdən sonra orucunu aça bilər. Belə halda o, Ramazandan sonra sözügedən günlərin qəzasını tutmalıdır.
Bundan əlavə, orucu açmaq üçün qəsdən səfərə getmək də olar. Lakin belə bir əməl məkruh (yerinə yetirildikdə heç bir günah yazılmayan, lakin bəyənilməyən əməl) hesab edilir.
İşi səfər etmək olan, yaxud səfəri günah səfər olan şəxs səfərdə oruc tuta bilər. Hətta Ramazan ayının orucu kimi vaxtı müəyyən olan vacib orucları səfərdə mütləq tutmalıdır.
Məsələni bilmədiyinə görə səfərdə oruc tutan və gün ərzində bu məsələni başa düşən şəxsin orucu batildir. Lakin məsələni məğribdən sonra başa düşərsə, tutduğu oruc düzgündür.
İnsan müsafir olduğunu unudarsa, yaxud oruc tutmağın müsafir üçün batil bir iş olduğunu unudarsa və səfərdə oruc tutarsa, vacib ehtiyata əsasən, hətta məğribdən sonra başa düşdüyü halda belə orucu batildir.
