Gəncə Şəhər İcra Hakimiyyətinin təşkilatçılığı ilə bölgədə şərab turizminin inkişaf etdirilməsi ilə bağlı müzakirələrə dair görüş keçirilib. Bu haqda 28 fevral tarixində İcra Hakimiyyətinə istinadən xəbər veririk.
İcra Hakimiyyəti başçısının müavini Adil Tağıyev, Regional Turizm İdarəsinin rəisi Zaur Bayramov, Regional Mədəniyyət İdarəsinin rəisi vəzifəsini müvəqqəti icra edən Pərvin Kazımov və digər aidiyyəti qurumların rəhbər və nümayəndələri “Gəncə Şərab - 2”də olublar. Qonaqlara müəssisədə istehsal edilən məhsullar barədə ətraflı məlumat verilib. Rəsmilər burada istehsal prosesini də izləyiblər.
Görüş “2018-2025-ci illərdə Azərbaycan Respublikasında şərabçılığın inkişafına dair Dövlət Proqramı”nın müvafiq bəndinin icrası ilə əlaqədar olaraq təşkil olunub. Daha sonra bölgədə şərab turizminin inkişafı ilə bağlı müzakirələr aparılıb. Gəncədə enoturizmin inkişaf etdirilməsi üçün müvafiq qurumların qarşılıqlı fəaliyyətinin önəmi qeyd olunub, müəyyən təkliflər səsləndirilib.
