Gəncədə qayda pozan sürücülər həbs ediliblər. Bu haqda 17 fevral tarixində Report-a istinadən xəbər veririk.
Dövlət Yol Polisi Şöbəsinin əməkdaşları yollarda sürücü və piyadaların təhlükəsizliyinin təmin edilməsi, ictimai asayişin qorunması istiqamətində tədbirlər keçiriblər. Nəticədə şəhər ərazisində avtoxuliqanlıq edərək ictimai asayişi nümayişkaranə şəkildə pozan və bununla da vətəndaşların narazılığına səbəb olan sürücülər saxlanılıblar.
Söhbət Akif Məmmədov və Fərəc Əmirovdan gedir. Onlar idarə etdikləri avtomobillə qarlı hava şəraitində yol hərəkəti qaydalarını kobud şəkildə pozaraq, təhlükəli manevrlər edərək avtoxuliqanlıq edib və görüntüləri videoya çəkərək sosial şəbəkələrdə paylaşıblar. Həmin şəxslər barəsində protokol tərtib edilərək baxılması üçün məhkəməyə göndərilib. Məhkəmənin qərarı ilə onların hər biri 15 sutka inzibati qaydada həbs edilib.
Bundan başqa, keçirilən monitorinqlər zamanı “Niva” avtomobilinin sürücüsünün qanunla qadağan edilmiş səs siqnalından istifadə etdiyi müəyyən olunub. Onun barəsində tərtib olunan protokol və səs siqnalı müsadirə edilməsi üçün məhkəməyə göndərilib.
[modula id="54971"]
