Türkiyənin Qars şəhərində yerləşən Qafqaz Universitetinin rəhbər nümayəndə heyəti Gəncəyə gəlib. Bu haqda 24 yanvar tarixində ADAU-ya istinadən xəbər veririk.
Şəhərimizə gələn qonaqlar Azərbaycan Dövlət Aqrar Universitetinin Baytarlıq təbabəti fakültəsində olublar. Onlar fakültənin maddi-texniki bazası və tələbələrin ən müasir tələblərə uyğun təhsil alması üçün yaradılan şəraitlə tanış olublar.
Daha sonra Azərbaycan Respublikasının Türkiyə Respublikasındakı səfirliyinin təhsil məsələləri üzrə müşaviri Nəcibə Nəsibova və Qafqaz Universitetinin rektoru Hüsnü Kapu Baytarlıq təbabəti fakültəsinin bir qrup professor-müəllim heyəti ilə görüş keçirib. ADAU-nun rektoru Zəfər Qurbanov deyib ki, yaxın gələcəkdə həyata keçiriləcək bir çox yerli və beynəlxalq layihələr bu istiqamətdə işləri daha da sürətləndirəcək.
