Gəncənin qəsəbələrindən birində qədim evlər baxımsız qalıb. Bu haqda 15 fevral tarixində Oxu.az-a istinadən məlumat veririk.
Sözügedən hal Hacıkənd qəsəbəsində müşahidə olunur. Burada yerləşən təxminən iki əsr yaşı olan evlər dağılır. Bununla bağlı sosial şəbəkələrdə paylaşım edilib.
Bildirilir ki, qəsəbədə 50-dən çox belə ev olub. Həmin tikililərin vaxtı ilə varlı bəylər tərəfindən tikdirildiyi, sonralar istirahət düşərgələri olması qeyd edilib. Lakin hazırda bir çox evlərin izləri də itib. Digərlərinin isə divarları, daşları, yarımçıq damları qalıb. Sakinlərin sözlərinə görə, uzun illərdir təmir-bərpa işi aparılmayan bu evlər yox olmaq təhlükəsi ilə üzləşib.
Məsələ ilə bağlı İcra Hakimiyyəti açıqlama verib. Bildirilib ki, ölkə ərazisində olan dünya əhəmiyyətli, ölkə əhəmiyyətli və yerli əhəmiyyətli tarixi abidələr qeyd olunub. Həmin binalar tarixi abidələr kimi qeydiyyata alınmayıb. Yəni o siyahıda deyil. Vaxtı ilə o binalar Gəncə Dəmir Yol İdarəsinin yay istirahət düşərgəsinin ərazisində yerləşib. Hazırda isə qurumda olan məlumata görə, bu binalar özəlləşdirilib.
