Gəncədə regional tədbir təşkil olunub. Bu haqda 10 aprel tarixində Peşə Təhsili üzrə Dövlət Agentliyinə istinadən məlumat veririk.
Dövlət-özəl tərəfdaşlığına dair regional forum Peşə Təhsili üzrə Dövlət Agentliyinin təşkilatçılığı ilə baş tutub. Burada agentliyin rəhbərliyi, Milli Məclisin deputatı Pərvin Kərimzadə, Dövlət Məşğulluq Agentliyi və Dövlət Turizm Agentliyinin nümayəndələri, iqtisadi rayonda fəaliyyət göstərən özəl sektor nümayəndələri iştirak ediblər.
Qonaqlar öncə mərkəzin infrastrukturu və maddi-texniki bazası ilə tanış olublar. İştirakçılara burada tələbələr üçün yaradılmış imkanlar, tədris olunan ixtisaslar haqqında ətraflı məlumat verilib. Bildirilib ki, 1300-dən çox şəxsin təhsil aldığı müəssisədə, əsasən, İKT, nəqliyyat, dağ-mədən və digər xidmət istiqamətləri üzrə peşə ixtisaslarının tədrisi həyata keçirilir. Liseyin qarşısına qoyulan əsas məqsəd regionda əmək bazarının tələblərinə uyğun ixtisaslı kadrların hazırlanması prosesinə dəstək verməkdir.
Görüşdə, həmçinin regionda işəgötürənlərlə peşə təhsili sistemi arasında əməkdaşlıq imkanları müzakirə olunub. Daha sonra işəgötürən qurumların nümayəndələri müxtəlif əməkdaşlıq modelləri əsasında peşə təhsil müəssisələri ilə işin qurulmasının hər iki tərəf üçün əlverişli olduğunu qeyd ediblər.
