Gəncədə çalışan müəllimlər xarici ölkədə təlimlərə qatılıblar. Bu haqda 30 mart tarixində Regional Təhsil idarəsinə istinadən məlumat veririk.
Söhbət 14 nömrəli tam orta məktəbin təlim-tərbiyə işləri üzrə direktor müavini Nərmin Fətəliyeva və Fizika, riyaziyyat və informatika təmayüllü liseyin ingilis dili müəllimi Aynurə Musayevadan gedir. Onlar "Bir müəllimin manifesti" proqramı çərçivəsində ABŞ-yə səfər ediblər.
Proqram çərçivəsində təhsil işçiləri Corc Vaşinqton Universitetinin professor-müəllim heyəti tərəfindən məktəb müəllimləri və liderlərinə tədrisin idarə edilməsi ilə bağlı ixtisasartırma proqramında iştirak edirlər. Onlara, həmçinin akademik məqsədlər üçün ingilis dili tədris proqramının təşkilində yaradıcı yanaşma mövzusunda mühazirə və seminarlar keçirilir. Bu müddət ərzində proqram iştirakçıları yuxarıda qeyd olunanlardan əlavə, müxtəlif yerli məktəb, kollec və universitetlərə səfər edirlər.
