Nizami Gəncəvi yaradıcılığının müasir tədqiqatlarına dair yeni kitab təqdim olunub. Bu haqda 12 fevral tarixində Azərbaycan Milli Elmlər Akademiyası Gəncə Bölməsinə istinadən xəbər veririk.
AMEA Gəncə Bölməsində filologiya elmləri doktoru professor Ramazan Qafarlının “Nizami poeziyasında məkan, zaman və kəmiyyət vəhdəti (folklor-mifoloji düşüncə kontekstində)” monoqrafiyasının təqdimatı keçirilib. Görüş AMEA Folklor İnstitutu ilə birgə təşkil olunub. Burada əməkdaşlar öz çıxışlarında Ramazan Qafarlının tədqiqatlarının müasir Azərbaycan filoloji düşüncəsinin parlaq nümunələri olduğunu bildiriblər.
Tədbirdə müəllif monoqrafiyanın ayrı-ayrı bölmələrində Nizami Gəncəvinin milli mənsubiyyətinin, onun gəncəli türk olmasının bir daha aydınlaşdırılması məsələsi haqda, həmçinin Nizami poeziyasının gizli qatlarında qorunub saxlanan və üzdə olub müxtəlif cür yozulan cəhətlərindən söz açıldığını iştirakçıların diqqətinə çatdırıb.
Qeyd edək ki, Ramazan Qafarlının “Nizami poeziyasında məkan, zaman və kəmiyyət vəhdəti (folklor-mifoloji düşüncə kontekstində)” monoqrafiyası “Elm və təhsil” nəşriyyatında işıq üzü görüb. 374 səhifəlik monoqrafiyanın elmi redaktorları filologiya elmləri doktoru professor Seyfəddin Rzasoy və filologiya üzrə fəlsəfə doktoru dosent Qalib Sayılov, rəyçiləri isə filologiya üzrə fəlsəfə doktoru Əlimuxtar Muxtarov və filologiya üzrə fəlsəfə doktoru Nizami Adışirinovdur.
