Gəncə Şəhər İcra Hakimiyyətinin başçısı növbəti dəfə vətəndaşlarla görüşüb. Bu haqda 8 mart tarixində İcra Hakimiyyətinə istinadən xəbər veririk.
Niyazi Bayramov 39 nömrəli tam orta məktəbdə vətəndaşları qəbul edib. Görüşdən əvvəl qonaqlar təhsil müəssisəsinin şəhid məzunlarının xatirəsinə yaradılan lövhəni ziyarət ediblər. Daha sonra təhsil müəssisəsində görkəmli ədib, böyük alim Mir Cəlal Paşayevin adına olan sinif otağına baxış keçirilib, burada yaradılan şəraitlə tanışlıq olub.
Şəhər başçısı görüşdə iştirak edən xanımları qarşıdan gələn 8 Mart - Beynəlxalq Qadınlar Günü münasibətilə təbrik edib. Daha sonra şəhər sakinləri onları narahat edən məsələləri gündəmə gətiriblər. Səsləndirilən müraciətlərdə işlə təminat, fərdi yaşayış evinin təmiri, maddi yardım və digər məsələlər üstünlük təşkil edib.
Vətəndaşlar fərdi qaydada dinlənilərək onların səsləndirdikləri problemlərin qısa zamanda aradan qaldırılması istiqamətində müvafiq tapşırıqlar verilib. Qaldırılan bir çox məsələlər yerindəcə öz həllini tapıb, digər müraciətlər qeydiyyata alınaraq, aidiyyəti qurumlara həvalə edilib.
