Gəncədə “Kəpəz”in mərhum kapitanının xatirəsi anılıb. Bu haqda 23 fevral tarixində futbol klubuna istinadən məlumat veririk.
Söhbət Müzəffər Qasımovdan gedir. Mərhum futbolçu və məşqçinin anadan olmasının 83-cü ildönümündə SSRİ idman ustasının məzarı ziyarət olunub. Burada onun ailə üzvləri, veteran futbolçular və klubun rəhbərliyi iştirak ediblər. Əməkdar məşqçinin Fəxri xiyabandakı məzarı üzərinə qərənfillər düzülüb, ruhuna dualar oxunub.
Gəncə Futbol Akademiyasının direktoru Cabir İbrahimov, əsas komandanın baş məşqçisi Adil Şükürov, Gəncə Regional Futbol Federasiyasının sədri Nurəddin Əliyev və digərləri Müzəffər Qasımov haqqında xatirələrini bölüşüblər. Bildirilib ki, şəhərimizdə peşəkar futbol klubunun yaradıldığı ilk ildən Müzəffər Qasımov komandanın heyətində olub. O, “Dinamo”nu kapitan kimi SSRİ Çempionatının Yüksək Liqasında meydana çıxarıb. Karyerasını başa vurduqdan sonra da müxtəlif illərdə doğma komandasına baş məşqçi və klub rəsmisi kimi xidmət edib.
