Gəncədə yaşıllaşdırma aksiyası davam edir. Bu haqda 22 fevral tarixində MKTİB-yə istinadən xəbər veririk.
Şəhərin müxtəlif ərazilərində mövsümi yaşıllaşdırma işləri aparılıb. Əkin işlərinə Mənzil Kommunal Təsərrüfatı İstehsalat Birliyinin canlı qüvvə və texnikası cəlb edilib. Yaşıllaşdırma şöbəsində gülçülük və tingçilik sahəsində becərilən müxtəlif növ ağaclar, dekorativ kollar və güllər şəhərin park və xiyabanlarına, yol kənarlarına köçürülüb.
Heydər Əliyev və Nizami Gəncəvi prospektində, Heydər Əliyev parkının qarşısında, "Qala Qapıları" kompleksinin ərazisində sərv, Eldar şamı, çinar, kedra və konusvari tuya ağacları əkilib. Həmçinin adıçəkilən ərazilər dekorativ leylandra və perikanta kolları, mövsümi primula və kələm gülləri ilə bəzədilib, park və xiyabanlarda solmuş qazon örtüyü yenisi ilə əvəz edilib. Aksiya çərçivəsində şəhərin yaşıllıq zolaqlarına aqrotexniki qulluq göstərilib, suvarılması təmin olunub.
