Gəncədə MKTİB gücləndirilmiş iş rejimində çalışır. Bu haqda 23 yanvar tarixində MKTİB-yə istinadən xəbər veririk.
Havaların şaxtalı və qarlı keçməsi ilə əlaqədar olaraq Mənzil Kommunal Təsərrüfatı İstehsalat Birliyinin maşın və mexanizmləri tam hazır vəziyyətə gətirilib. Burada məqsəd qarlı və şaxtalı havalarda şəhərdaxili yollarda avtomobillərin, eləcə də piyadaların təhlükəsiz, rahat şəkildə hərəkətinin təmin olunması üçün yolların qardan və buzdan operativ şəkildə təmizlənməsidir. Buzlu yollarda və səkilərdə hərəkətin intensivliyini təmin etmək üçün MKTİB-nin anbarlarına zəruri miqdarda qum və duz ehtiyatı da tədarük olunub.
MKTİB-nin balansında olan 14 Mənzil İstismar İdarəsinin hər birinə əraziləri üzrə binaların qarşısını və səkiləri qardan təmizləmək üçün lazımi sayda kürək, bel, işçilərə isə xüsusi qış geyimləri paylanılıb.
