Samux rayonu Qarayeri qəsəbə 2 nömrəli tam orta məktəbin kollektivi 2025–2026-cı tədris ilindən vahid geyim formasından istifadə edəcək.
Məktəbdən muallim.еdu.аz-a verilən məlumata görə, ötən tədris ilində keçirilmiş Pedaqoji Şurada bu barədə yekdil qərar qəbul edilib.
Yeni tədris ilindən müəllimlərin yay geyim forması belə olacaq: qadınlar üçün ağ kofta, göy qalstuk və qara ətək; kişilər üçün qara şalvar, ağ köynək və qara qalstuk.
Soyuq aylarda isə jilet və kostyumlardan istifadə nəzərdə tutulur.
Qərar 30 nəfərdən ibarət olan pedaqoji və rəhbər heyətə şamil olunur. Məqsəd müəllimlər arasında bərabərlik prinsiplərini möhkəmləndirmək, nizam-intizamı artırmaq və məktəb mühitində sağlam psixoloji atmosfer yaratmaqdır.
Gəncə-Daşkəsən Regional Təhsil İdarəsindən qeyd edilib ki, bu təşəbbüs artıq bir neçə təhsil müəssisəsində uğurla tətbiq olunur.
Goranboy rayon Kəhrizli kənd, Quşçular kənd, Eyvazlılar kənd tam orta məktəbləri, Goranboy şəhər 2 nömrəli tam orta məktəb və Samux rayon Qədili kənd ümumi orta məktəbi pedaqoji heyətləri də uzun illərdir ki, vahid formadan istifadə edirlər.
