Məktəblilər üçün “Təbiətin dostu” adlı layihə təşkil olunacaq

Gəncədə daha bir layihə start götürəcək. Bu haqda 17 yanvar tarixində Dünya məktəbinə istinadən məlumat veririk.

“Yaşıl dünya naminə həmrəylik ili”nə həsr edilmiş “Təbiətin dostu” layihə müsabiqəsi elan olunub. Burada bütün ümumtəhsil məktəblərinin hal-hazırda 5-8-ci siniflərində təhsil alan şagirdləri iştirak edə bilərlər. Layihə Gəncə Dünya Məktəbi tərəfindən həyata keçirilir.

İştirakçılardan tələblər aşağıdakı kimidir:

• Şagirdlər 3-6 nəfərdən ibarət komandalar halında müsabiqəyə qoşula bilərlər;


• Komanda tərkibi eyni məktəbdən ibarət olmalıdır;


• Komandalar eyni sinif və ya fərqli siniflər üzrə şagirdlərdən təşkil oluna bilər;


• Hər komandada bir nəfər mentor-müəllim müəyyən olunmalıdır;


• Mentor-müəllim komanda üzvlərindən təhsil aldığı məktəbdə çalışan istənilən fənn müəllimi ola bilər;


• Hər məktəb bir neçə komanda ilə iştirak edə bilər;


• Bir şagird və mentor-müəllim yalnız bir layihə üzrə iştirak edə bilərlər.

Müsabiqəyə işlərini göndərmiş komandaların layihələri münsiflər heyəti tərəfindən qiymətləndiriləcək. Ən yaxşı layihəni hazırlamış komandalar finala keçəcək. Burada münsiflər heyəti tərəfindən qaliblər müəyyənləşəcək. Həmin komandanın şagirdləri və müəllimləri müxtəlif hədiyyə və diplomlarla təltif ediləcəklər.

Layihələr üçün şərtlər:

• Komandalar öz layihələrini I mərhələ üçün yalnız yazılı sənəd formatında işləyib göndərməlidirlər;


• Komanda öz layihəsinin maksimum 500 sözdən ibarət yazılı mətnini Word proqramında “Times New Roman” 14 şrifti ilə 1,5 sətirarası intervalla təqdim etməlidir;


• Layihənin daha anlaşılıqlı olması üçün müxtəlif şəkil və illüstrasiyalar yerləşdirilə bilər;


• Layihə Azərbaycan, rus və ingilis dillərində hazırlana bilər;


• Layihələr orijinal olmalı və əvvəl müxtəlif layihələrdə nümayiş olunmuş işlər olmamalıdır (aşkarlandığı anda layihə kənarlaşdırılacaq).

Final mərhələsi üçün layihələr prototiplər, maketlər və real nümayiş formatında sərgilənməlidir.

Müsabiqəyə təqdim olunan layihələr aşağıdakı kateqoriyalardan birinə aid olmalıdır:

• Zibil-tullantı və təkrar emal;


• Sərfəli və təmiz enerji;


• İqlim dəyişikliyinə qarşı mübarizə;


• Hava çirkliliyi;


• Sağlam həyat (tibb);


• Biomüxtəliflilik;


• Nəsli kəsilməkdə olan bitki və heyvan növlərinin mühafizəsi;


• Torpaq ekosisteminin mühafizəsi;


• Dəniz ekosisteminin mühafizəsi;


• Təmiz su və sanitariya;


• Ətraf mühit və yaşıl enerji (enerji kimi istifadə olunan bitkilər);


• Karbon neytral formata keçid;


• Ekoməktəb və ekofəallar.