Gəncədə bir sıra ərazilərin sakinləri mavi yanacaqdan məhrum olunublar. Bu haqda 23 mart tarixində Xəzər Xəbər-ə istinadən məlumat veririk.
Söhbət şəhərin Məhsəti qəsəbəsinin 34-36-cı küçələrindən gedir. Burada yaşayan əhali qaz təchizatının olmamasından narahatdır. Bildirilir ki, qəsəbədə bəzi yeni salınan küçələrə qaz çəkilib. Lakin digər ərazilər mavi yanacaqla təmin olunmayıb.
Məsələ ilə bağlı “Azəriqaz”ın nümayəndəsi açıqlama verib. Qeyd olunub ki, Məhsəti qəsəbəsinin bir hissəsinin qazlaşması birliyin gündəmindədir.
“Qəsəbənin bir hissəsinin qazlaşması cari ilin planına daxil edilib. Hazırda layihələndirmə işləri aparılır. 2024-cü ilin sonunadək yaşayış massivinin böyük hissəsinin qazlaşması icra olunacaq”, - deyə İB-nin mətbuat katibi Eldəniz Vəliyev əlavə edib.
