Gəncədə Ümumdünya Kitab və Müəllif Hüquqları Günü münasibəti ilə tədbir baş tutub. Bu haqda 24 aprel tarixində Mərkəzləşdirilmiş Kitabxana Sisteminə istinadən xəbər veririk.
Şəhərin 9 nömrəli Kitabxanasında “Mədəni irsin sənədli mənbəyi kitablar” adlı xülasə təşkil edilib. Burada 7 nömrəli tam orta məktəbin müəllim kollektivi çıxışlar edib. Onlar məktəblilərə Ümumdünya Kitab və Müəllif Hüquqları Günü haqqında məlumat veriblər.
Tədbirdə kitabxana əməkdaşı Azərbaycan, rus və xarici müəlliflərin əsərlərini: Nizami Gəncəvinin “Xəmsə”, Məhəmməd Füzulinin “Leyli və Məcnun”, Viktor Hüqonun “Səfillər”, Qurban Səidin “Əli və Nino”, Cek Londonun “Martin İden”, Herbert Uellsin “Seçilmiş əsərləri” kitablarının xülasəsini edib. Kitabxanaçı əlavə edib ki, hər bir dövlətin mədəniyyətinin qorunub saxlanılmasında və yüksəldilməsində kitabın mühüm rolu var.
Sonda şagirdlərlə kitab oxumağın, onların oxucu kimi böyüməsinə şərait yaratmağın vacibliyi mövzusunda maarifləndirici söhbət aparılıb.
