Gəncədə korrupsiya ilə bağlı tədbir baş tutub. Bu haqda 17 fevral tarixində Heydər Əliyev Mərkəzinə istinadən məlumat veririk.
“Korrupsiyaya qarşı mübarizənin hüquqi aspektləri” mövzusunda görüş Heydər Əliyev mərkəzində təşkil olunub. Burada Ombudsmanın Qərb Regional Mərkəzinin rəhbəri, Tarix-Diyarşünaslıq Muzeyinin, Mir Cəlal Paşayevin ev-muzeyinin, Mərkəzləşdirilmiş Kitabxana Sisteminin 3, 4 və 8 nömrəli kitabxana filiallarının əməkdaşları iştirak ediblər.
Tədbirdə Ombudsmanın Qərb Regional Mərkəzinin rəhbəri Səbuhi Abbasov bildirib ki, ölkəmizdə korrupsiyaya qarşı mübarizə tədbirlərinin davamlı olmasını təmin etmək, rüşvətxorluğa şərait yaradan halların qarşısının alınması məqsədilə islahatlar aparılır.
Qeyd olunub ki, korrupsiyaya və rüşvətxorluğa qarşı mübarizə tədbirlərinin istənilən effekti verməsi, yaxud əldə olunan nəticələrin davamlılığı ictimaiyyətin dəstəyi olmadan mümkün deyil. Çünki neqativ halların baş verməsində cəmiyyətin də üzərinə müəyyən məsuliyyət düşür və bu səbəbdən də vətəndaşlar sözügedən məsələdə öz qəti mövqeyini ortaya qoymalı, hüquq və vəzifələrini bilməli, neqativ hallarla mübarizədə ictimai nəzarət funksiyasını yerinə yetirməlidirlər.
Tədbir müzakirələrlə davam edib. Sonda iştirakçıların sualları cavablandırılıb.
