İspaniya təhsil müəssisəsinin nümayəndəsi Gəncəyə gəlib. Bu haqda 7 dekabr tarixində ATU-ya istinadən məlumat veririk.
İspaniyanın Jaen Universitetinin dosenti Azərbaycan Texnologiya Universitetinə baş çəkib. Ziyarət Erasmus+ proqramı çərçivəsində baş tutub.
Proqramın ilk günlərində universitetin dosenti Xuliyo Vena Oyanın Tədris işləri üzrə prorektor Raqif Hüseynov və Beynəlxalq əməkdaşlıq şöbəsinin əməkdaşları ilə görüşü keçirilib. Burada mövcud əməkdaşlığın genişləndirilməsi, ikili diplom proqramlarının tətbiqi, mübadilə sayının artırılması, hər iki ölkənin təhsil sistemi və mədəniyyəti ilə bağlı geniş müzakirələr aparılıb, təklif və tövsiyələr dinlənilib.
Sonra İqtisadiyyat və İdarəetmə fakültəsinin professor-müəllim heyəti ilə görüş təşkil olunub. Tədbirdə Marketing 5.0 texnologiyaları və Süni İntellekt mövzusunda maraqlı təqdimatla çıxış baş tutub və bu sahəyə dair məhsuldar fikir mübadiləsi aparılıb.
Xarici qonaq, həmçinin digər fakültə dekanları və professor-müəllim heyəti ilə görüşüb, sıx əməkdaşlıq imkanları müzakirə edilib.
