Gəncədə məktəblilərin bilikləri sınanacaq. Bu haqda 11 aprel tarixində Kəpəz televiziyasına istinadən məlumat veririk.
Monitorinq mayın 18-i baş tutacaq. Burada IV və VI sinif şagirdləri iştirak edəcəklər. Monitorinqə hazırlıq məqsədilə şəhərin orta məktəblərində test sınaqları təşkil olunur. Dördüncülər Azərbaycan dili və riyaziyyatdan 60 sual cavablandıracaqlar. 6-cı sinifdə oxuyanlara isə əlavə olaraq, təbiət fənni də daxil olmaqla 90 sual təqdim olunacaq.
Gəncə-Daşkəsən Regional Təhsil İdarəsinin nümayəndəsi bildirir ki, yoxlamaya hazırlıq zamanı məktəblilərin bilik və bacarıqları, həmçinin çərçivə sənədi ilə bağlı tanışlıqlar həyata keçirilir. Ötən tədris ilində də dördüncü sinif şagirdləri üçün monitorinq baş tutub. Bu təhsil ilində də proses davam etdirilir. Həmçinin altıncı siniflər də əlavə olunub.
Qeyd edək ki, monitorinqə 4479 nəfər dördüncü və 4264 altıncı sinif şagirdi cəlb ediləcək.
