Gəncədə tələbələrlə görüş təşkil olunub. Bu haqda 6 mart tarixində GDU-ya istinadən məlumat veririk.
2023/2024-cü tədris ilində Gəncə Dövlət Universitetinin buraxılış kursu tələbələrinin orta məktəblərdə pedaqoji internatura və müəssisələrdə istehsalat təcrübəsinin başlanması ilə əlaqədar iclas keçirilib. Burada fakültə üzrə təcrübə rəhbərləri, ixtisaslar üzrə metodistlər, pedaqoqlar və tələbələr iştirak ediblər.
Öncə universitetin Təcrübə və karyera şöbəsinin müdiri Cabbar Qarayev pedaqoji internatura və istehsalat təcrübəsinin başlaması münasibətilə tələbələri təbrik edib, onlara müvəffəqiyyətlər arzulayaraq məsuliyyətli olmağa çağırıb. Tədbirdə pedaqoji internaturanın mahiyyəti, görüləcək işlər, sınaq dərsləri haqqında məlumat verilib, eləcə də pedaqoji təcrübə rəhbərlərinə metodiki təlimat və tövsiyələrin verilməsi məsələsi müzakirə olunub.
