Gəncədə ərazilərin birində natəmizlik aradan qaldırılıb. Bu haqda Gencexeber.az-a 27 aprel tarixində məlumat daxil olub.
Bir neçə gün öncə şəhərin Cavadxan qəsəbəsində böyük bir ərazinin zibilliyə çevrilməsi barədə məlumat vermişdik. Məsələ ilə bağlı Mənzil Kommunal Təsərrüfatı İstehsalat Birliyinin Mətbuat Xidməti məlumat verib. Bildirilib ki, adıçəkilən əraziyə qurumun texnikası və canlı qüvvəsi cəlb olunub. Zibillər təmizlənərək ərazidən daşınması təmin edilib. Yaxın gələcəkdə isə əraziyə zibil konteynerlərinin yerləşdirilməsi həyata keçiriləcək.
Qeyd edək ki, Cavadxan qəsəbəsində xoşagəlməz mənzərənin yarandığı ərazi şəxsi mülkiyyət hesab olunur. Boş və nəzarətsiz qalan yerə isə sakinlər, həmçinin digər şəxslər tərəfindən mütəmadi olaraq məişət, təmir qalıqları və digər tullantılar atılır.
MKTİB əhaliyə bir daha müraciət edərək bildirir ki, şəhərimizin təmiz saxlanılmasında quruma dəstək olmaqla yanaşı, həmçinin ərazi üzrə daşınan tullantıların abonentlər tərəfindən aylıq ödənişləri vaxtı-vaxtında həyata keçirilsin.
