Gəncədə növbəti elmi seminar təşkil olunub. Bu haqda 20 dekabr tarixində ATU-ya istinadən məlumat veririk.
“Azərbaycan bölgələrinin maliyyə özünüyetərliyi” adlı tədbir Azərbaycan Texnologiya Universitetində (ATU) Elm və Təhsil Nazirliyi İqtisadiyyat İnstitutu tərəfindən keçirilib. Burada hər iki müəssisənin rəhbər heyəti və müvafiq professor-müəllim heyəti iştirak ediblər.
İqtisadiyyat İnstitutunun baş direktoru Nazim Müzəffərli Maliyyə Nazirliyinin sifarişi əsasında institut tərəfindən aparılan “Azərbaycan bölgələrinin maliyyə özünüyetərliyi” adlı tədqiqat işi və nəticələri barədə məruzə ilə çıxış edib. Bildirib ki, kitab şəklində nəşr edilmiş tədqiqat işi Azərbaycanın bölgələri üzrə aparılsa da, təklif edilən yanaşma digər ölkələrdə də tətbiq oluna bilər.
Seminar çərçivəsində elmi-tədqiqat işlərinin mövcud vəziyyətinə dair fikir mübadiləsi aparılıb, tədbir iştirakçılarının sualları cavablandırılıb.
