Gəncədə şəhər rəhbərliyi xarici qonaqlarla görüşüb. Bu haqda 24 yanvar tarixində İcra Hakimiyyətinə istinadən məlumat veririk.
Türkiyənin Qafqaz Universitetinin nümayəndə heyəti Nizami yurduna səfər edib. İcra başçısı Niyazi Bayramov universitetin rektoru Hüsnü Kapu və onun rəhbrəlik etdiyi nümayəndə heyəti ilə görüşüb.
Burada ölkəmizin Türkiyə Respublikasındakı Səfirliyinin təhsil məsələləri üzrə müşaviri Nəcibə Nəsibova, Azərbaycan Dövlət Aqrar Universitetinin rektoru Zəfər Qurbanov, beynəlxalq əlaqələr üzrə prorektor Engin Kılıç, Baytarlıq fakültəsinin dekanı Mete Cihan və Tibbi Mikrobioloji bölümün professoru Özgür Çelebi və İcra Hakimiyyəti başçısı Aparatının məsul əməkdaşları iştirak ediblər.
Niyazi Bayramov şəhərimizin tarixi, mədəniyyəti, elm və təhsil sahələri haqqında ətraflı məlumat verib. İcra başçısı ADAU-nun ölkənin aqrar sahəsinin inkişafında böyük rolu olduğunu vurğulayıb.
Hüsnü Kapu səmimi görüş üçün şəhər rəhbərliyinə təşəkkürünü bildirib. O, təmsil etdiyi ali təhsil ocağının fəaliyyət istiqamətləri, tədris olunan ixtisaslar və kadr hazırlığı üzrə aparılan işlərdən bəhs edib və ADAU ilə əməkdaşlıqda xüsusi maraq kəsb edən sahələrə toxunub.
Sonda qarşılıqlı xatirə hədiyyələri təqdim olunub və şəkil çəkdirilib.
