Bu gün şəhid Əfqan İmanovun doğum günüdür.
Əfqan Nazim oğlu İmanov 3 sentyabr 1967-ci ildə Daşkəsən rayonunda anadan olub. Burada Səməd Vurğun adına orta məktəbi bitirdikdən sonra həqiqi hərbi xidmətə çağırılıb. İki il Kalininqrad şəhərində xidmət edib. Qayıtdıqdan sonra Gəncə şəhərinə gəlib. Burada sürücü olaraq çalışıb.
Əfqan 1992-ci ilin iyun ayında Nizami Rayon Hərbi Komissarlığı tərəfindən döyüşlərə cəlb olunub. Ağdam, Tərtər, Goranboy rayonları ərazisində gedən müharibə ocaqlarına dəfələrlə silah-sursat daşıyıb, tağım komandirinin müavini vəzifəsində çalışıb.
Əfqan Nazim oğlu İmanov 4 sentyabr 1993-cü ildə öz avtomobili ilə Goranboy rayonunun Gülüstan qəsəbəsinə silah-sursat aparan zaman ermənilərin atdıqları top mərmisinə tuş gələrək şəhidlik zirvəsinə yüksəlib.
Şəhidimiz növbəti gün Gəncə şəhər Şəhidlər xiyabanında dəfn edilib.
Əfqan İmanov və onunla həlak olan əsgər yoldaşı Zakirin şərəfinə Goranboy rayonunun Gülüstan qəsəbəsində hadisənin baş verdiyi yerdə xatirə bulağı inşa olunub.
