Bu gün şəhid Ənvər Arazov və Bahadur Səttarzadənin doğum günüdür.
Ənvər Talış oğlu Arazov 2 dekabr 1953-cü ildə Gəncədə anadan olub. Gəncə Politexnik İnstitutunu bitirib. Murmansk vilayətinin Severomorsk şəhərində hərbi dəniz donanmasında xidmət edib. “Büllur” zavodunda fəhlə, nizamlayıcı və növbə ustası işləyib.
O, xalq hərəkatının öncüllərindən biri idi. 20 Yanvar faciəsi zamanı Gəncəyə rus qoşunlarının gəlməsinin qarşısının alınmasında iştirak edib.
2 oktyabr 1992-ci ildə briqada komandirinin müavini təyin olunub. Göstərdiyi hərbi şücaətə görə, ona polkovnik rütbəsi verilib.
Ənvər Talış oğlu Arazov noyabrın 1-dən 2-nə keçən gecə 1992-ci ildə döyüşlərdən birində şəhidlik zirvəsinə ucalıb.
Prezident tərəfindən 6 noyabr tarixində Milli Qəhrəman adına layiq görülüb.
Bahadur Barat oğlu Səttarzadə 2 dekabr 1964-cü ildə Gəncədə anadan olub. Orta təhsilini 4 saylı orta məktəbdə alıb. 1979-cu ildə texniki-peşə məktəbini fərqlənmə diplomu ilə bitirib. Bir müddət Həştərxan şəhərində işləyib.
O, 1991-ci ildə Vətənə qayıdaraq könüllü cəbhəyə yollanıb. İlk döyüş əməliyyatına Ağdərə bölgəsində başlayıb. Sonra Todan, Sarısu, Tərtər ətrafında vuruşub. Tərtərin bir neçə kəndi uğrunda gedən döyüşlərdə iştirak edib.
Bahadur Barat oğlu Səttarzadə 21 fevral 1992-ci ildə Marquşevan kəndində şəhidlik zirvəsinə ucalıb.
Şəhidimiz iki gün sonra Gəncə Şəhidlər xiyabanında dəfn olunub.
