Bu gün şəhid Bəhruz İsgəndərovun doğum günüdür.
Bəhruz Abbas oğlu İsgəndərov 29 noyabr 1986-cı ildə Gəncədə anadan olub. 17 nömrəli tam orta məktəbi bitirib. Bakı Texniki Kollecində “Avtomobil və maşınqayırma” ixtisasına yiyələnib.
O, 2006-cı ildə hərbi xidmətə çağırılıb. 2015-ci ildən MAXE hərbi qulluqçu kimi fəaliyyət göstərməyə başlayıb. 2015-2020-ci illərdə Azərbaycan Sülhməramlı Qüvvələrinin tərkibində Əfqanıstanda xidmət edib.
Bəhruz İsgəndərov Vətən müharibəsində iştirak edib. Füzuli rayonu, Tərtər rayonunun Suqovuşan kəndi, Xocavənd rayonunun Ağoğlan (Hadrut) qəsəbəsi və Laçın rayonu istiqamətində gedən döyüşlərdə vuruşub.
Bəhruz Abbas oğlu İsgəndərov 29 oktyabr 2020-ci ildə Laçın dəhlizi uğrunda gedən döyüşlərdə şəhidlik zirvəsinə ucalıb.
O, növbəti gün Gəncə şəhərinin Şəhidlər xiyabanında dəfn olunub.
Şəhidimiz ölümündən sonra Prezident tərəfindən III dərəcəli “Vətənə xidmətə görə”, “Vətən uğrunda”, “Cəbrayılın azad olunmasına görə”, “Qubadlının azad olunmasına görə” və “Laçının azad olunmasına görə” medalları ilə təltif edilib.
